Askasleikir mun prýða Óslóartréð

Askasleikir er jólaórói Styrktarfélags lamaðra og fatlaðra í ár. Guðmundur Oddur Magnússon (Goddur) hannaði óróann og Ásta Fanney Sigurðardóttir, handhafi Ljóðstafsins í ár, samdi kvæði um kappann.

Askasleikir mun prýða greinar Óslóartrésins á Austurvelli en kveikt verður á ljósum trésins næstkomandi sunnudag, 3. desember, kl. 16.

Þetta er í tólfta sinn sem Styrktarfélag lamaðra og fatlaðra gefur út jólaóróann. Kertasníkir var fyrstur í röðinni en hann kom út fyrir jólin 2003. Reykjavíkurborg hefur frá upphafi stutt verkefnið með því að skreyta Óslóartréð með óróa ársins. Allur ágóði af sölu jólaóróanna rennur til Æfingastöðvarinnar en þangað sækja börn og ungmenni með frávik í hreyfingum og þroska þjónustu. Þau fá aðstoð sjúkra- og iðjuþjálfa við að bæta færni sína í leik og starfi svo þau geti þroskast, dafnað og notið lífsins.

Sala Askasleikis fer fram í gjafavöruverslunum um land allt dagana 6. - 20. desember og í glænýrri netverslun Styrktarfélagsins: http://www.jolaoroinn.is. Askaleikir kemur í gjafaöskju og honum fylgir bæklingur með ljóði eftir Ástu Fanneyju Sigurðardóttur.

Nótt nr. 17 

heyr! heyr! heyrist hvíslað

hann sleikir upp upp upp til agnanna

tæmir alla askana 

betri uppvaskara 

er hvergi hægt að finna

* * *

Glerrósir uxu hægt 
upp glugga nr. tungl

hvísluðu á milli sín í stillu 

er þetta hann?
töldu niður

- daga

- mín 

- sek

til nætur nr. 17 

hvað eruð þið að gera?

spurði ég

við erum að fylgjast með slefi í niðdimmu

það drýpur úr vikunum

það lekur úr askinum

frystir kristöllum 

í taumunum

* * *

Norðurslæður læddust 

niður náttþak

dönsuðu ljósi á milli sín í stillu

þarna er hann! 
töldu upp litina
- gult 

- grænt

- blátt

þar til allur himininn leiftraði 

hvað eruð þið að gera? 
spurði ég

við erum að lýsa upp nóttina fyrir rúðurósir
svo þær sjái 
askana

galtóma

slefaða 

sleikta

ístauma

niður

hökuna 

svo þær sjái 

kettina

svekta

hundana 

gelta

á svein í makindum

sleikjandi ask

* * *

heyr! heyr! heyrist hvíslað

hann sleikir upp upp upp til agnanna

tæmir alla askana 

betri uppvaskara 

er hvergi hægt að finna

-       Ásta Fanney Sigurðardóttir