Jólakort Styrktar- og líknarsjóðs Oddfellowa styrkir Æfingastöðina

Styrktar- og líknarsjóður Oddfellowa hefur í áraraðir útbúið og selt jólakort fyrir jólin og nýtt ágóðann til góðra verka. Í ár rennur allur ágóði óskiptur til Æfingastöðvarinnar. 

 

Æfingastöðin er miðstöð þjónustu og þekkingar í endurhæfingu fyrir börn og ungmenni. Sjúkra- og iðjuþjálfar með víðtæka reynslu af þjálfun barna og ungmenna veita ráðgjöf og þjálfun með það að markmiði að efla þátttöku í daglegu lífi og auka þannig lífsgæði barnsins og fjölskyldunnar. 

Æfingastöðin er í eigu Styrktarfélags lamaðra og fatlaðra  sem hefur frá upphafi rutt braut og unnið dýrmætt frumkvöðlastarf í þjónustu við fötluð börn, ungmenni og fjölskyldur þeirra. Fyrsta verkefni félagsins var stofnun og rekstur Æfingastöðvarinnar árið 1956 og hefur síðan farið þar fram umfangsmesta sjúkra- og iðjuþjálfun barna og ungmenna á landinu. 

 

Myndin sem prýðir jólakortið og merkispjöldin í ár er eftir Ólaf Th. Ólafsson en inni í kortinu er fallegt ljóð eftir Dag St. Ásgeirsson.

Fáanleg í afgreiðslu Æfingastöðvarinnar að Háaleitisbraut 13 og vefverslun SLF.